पोलिस बनायचे स्वप्न अधुरेच राहिले; ठाण्यातील तरुणाने सुसाईड नोटमध्ये ट्रॅफिक पोलिसाचे नाव घेऊन संपवले जीवन


भारतीय लष्कर आणि पोलीस दलात भरती होण्याचे स्वप्न पाहणाऱ्या तरुणाने आत्महत्या केल्याची खळबळजनक घटना ठाण्यात घडली आहे. मद्यपान करून वाहन चालवल्याप्रकरणी गुन्हा नोंदवल्याने करियर संपुष्टात येईल, या भीतीने तरुणाने हे टोकाचे पाऊल उचलल्याचे म्हणले जात आहे. दरम्यान, तरुणाने आत्महत्या करण्यापूर्वी आईच्या मोबाईलवर सुसाईड नोटही पाठवली आहे. त्यात काही वाहतूक पोलिसांची नावे असल्याचे समजते. मनीष उटकर असे या तरुणाचे नाव आहे.


सुसाईड नोटमध्ये पोलिसाचे नाव

घटनेची अधिक माहिती अशी की, मनीष उटकर हा आत्महत्या करणारा तरुण हा ठाणे येथील वागळे इस्टेट परिसरात राहत होता. त्याला पोलीस दलात किंवा सैन्यात भरती व्हायचे होते. त्याची तयारीही सुरू झाली होती. तो स्पर्धा परीक्षा देत असे. मात्र तरुणाने आईच्या साडीचा वापर करून आपल्याच राहत्या घरी गळफास लावून घेतला.

सुसाईड नोटमध्ये काय लिहिले होते?


आत्महत्येपूर्वी मनीषने आईच्या मोबाईलवर सुसाईड नोट पाठवली होती. सुसाईड नोटमध्ये त्याने गटारी अमावस्याच्या दिवशी काही मित्रांसोबत मद्यपान केल्याचे म्हटले आहे. त्यानंतर पूर्व ठाण्यातील कोपरी परिसरात दारूच्या नशेत गाडी चालवत असताना वाहतूक पोलिसांनी त्याला ताब्यात घेतले. त्याच्यावर दारू पिऊन गाडी चालवल्याचा गुन्हा दाखल करण्यात आला होता. त्याने पोलिसांना दोन दिवसांत केस मागे घेण्यास सांगितले आणि दंड भरणार असल्याचे सांगितले, मात्र पोलिसांनी त्याला न्यायालयात जाण्यास सांगितले. कोर्टात गेल्यास आपली करियर संपेल या भीतीने त्याने आत्महत्या केली. यात गुंतलेल्या पोलिस अधिकाऱ्यांनी त्याचे करिअर बरबाद करण्याची धमकी दिल्याचा दावाही त्याने सुसाईड नोटमध्ये केला आहे. या प्रकरणी काही वाहतूक पोलिसांची नावे सुसाईड नोटमध्ये लिहिली आहेत.